जसपाको दुई दिने प्रशिक्षण कार्यक्रम बैशाख १६ र १७ गते पोखरामा हुने

पोखरा — जनता समाजवादी पार्टी (जसपा), गण्डकी प्रदेशको आयोजनामा दुई दिने विशेष प्रशिक्षण कार्यक्रम पोखरामा हुने भएको छ। संघीय मामिला तथा सामान्य प्रशासनका पूर्वमन्त्री तथा जसपाका संघीय परिषद् अध्यक्ष राजेन्द्र श्रेष्ठको प्रमुख आतिथ्यमा कार्यक्रम सम्पन्न हुने जनाइएको छ।

गण्डकी प्रदेश इञ्चार्ज रुद्र बहादुर गुरुङका अनुसार प्रशिक्षण कार्यक्रम २०८२ साल बैशाख १६ र १७ गते बिहान ११ बजे पोखरास्थित रंगशाला गेट अगाडि सञ्चालन हुने छ। कार्यक्रममा पार्टीका विभिन्न तहका नेता तथा कार्यकर्ताहरूको सहभागिता रहनेछ।

गुरुङका अनुसार, प्रशिक्षण कार्यक्रमको उद्देश्य पार्टी संगठनलाई थप सुदृढ बनाउने, संघीयताको अभ्यासलाई प्रभावकारी बनाउने र समसामयिक राजनीतिक विषयमा कार्यकर्ताहरूलाई स्पष्ट मार्गदर्शन प्रदान गर्ने रहेको छ।

कार्यक्रममा संघीयता, सामाजिक न्याय, समावेशिता तथा पार्टीको भावी रणनीतिका विषयमा गहन छलफल र विचार आदानप्रदान गरिनेछ। यस प्रशिक्षणलाई जसपाले गण्डकी प्रदेशमा आफ्नो सांगठनिक उपस्थितिलाई मजबुत बनाउने अवसरका रूपमा लिएको छ।

पार्टीले सहभागीहरूलाई सक्रिय, अनुशासित र विचारशील कार्यकर्ता बनाउने लक्ष्यसहित प्रशिक्षणकाे तयारी गरिरहेको जनाएको छ।