लेखनाथ महाेत्सव १८ गते देखि शुरु हुने

पोखरा, पुस १५

लेखनाथ उद्योग वाणिज्य संघको आयोजनामा पुस १८ गतेदेखि माघ १ गतेसम्म पोखरा महानगरपालिका–२७, डाँडाको नाक, तालचोकमा २० औं लेखनाथ महोत्सव आयोजना हुने भएको छ। स्थानीय उत्पादन, पर्यटन, संस्कृति र आर्थिक गतिविधिलाई प्रवर्द्धन गर्ने उद्देश्यले आयोजना गरिने यो महोत्सवको तयारी अन्तिम चरणमा पुगेको संघले सोमबार आयोजित पत्रकार सम्मेलनमार्फत जानकारी गराएको हो।

महोत्सवका मुख्य उद्देश्य र विशेषता
‘महोत्सव लेखनाथको संस्कृति, स्थानिय उत्पादन, विकास र समृद्धि’ भन्ने नाराका साथ आयोजना हुने महोत्सवले स्थानीय कृषि र औद्योगिक उत्पादन, हस्तकलाका वस्तु, लघु तथा घरेलु उद्योगको प्रवर्द्धनमा जोड दिनेछ। संघका अध्यक्ष विनोद श्रेष्ठका अनुसार महोत्सवले आवश्यक ज्ञान, सिप र प्रविधि हस्तान्तरण गर्न, नवप्रतिभा प्रस्फुटन गराउन, तथा आन्तरिक र बाह्य पर्यटनलाई प्रोत्साहित गर्न मद्दत गर्नेछ।

महोत्सवमा ३३६ वटा स्टल रहने छन्, जसमा अटोमोवाइल, शैक्षिक र ग्रामिण प्रविधि, कृषि, हस्तकला, गार्मेन्ट, फुड एण्ड बेभरेज, डेरी तथा नेपाली उत्पादनका सामग्रीहरू प्रदर्शन गरिनेछ।

आर्कषणहरू र सांस्कृतिक गतिविधि
लेखनाथमा उत्पादित सुन्तला, माछा, मौरी, कफी, ताजा तरकारी र जैविक विविधताको प्रदर्शनीसँगै फुड फेस्टिभल, बाल उद्यान, उत्कृष्ट स्टल पुरस्कार, र सांस्कृतिक झाँकीहरू महोत्सवका मुख्य आर्कषण हुनेछन्। पप कन्सर्ट, मंगोलियन हर्टलगायतका लाइभ ब्यान्ड, तथा प्रमोद खरेलसहितका कलाकारहरूको प्रस्तुति सांगीतिक कार्यक्रमको विशेष आकर्षण हुनेछन्।

आर्थिक प्रक्षेपण र महोत्सवको योगदान
महोत्सवमा करिब ९ करोड रुपैयाँको आर्थिक कारोबार हुने अपेक्षा गरिएको छ। ८० लाख खर्च गर्दै ९० लाख आम्दानी गरी १० लाख बचत गर्ने लक्ष्य रहेको अध्यक्ष श्रेष्ठले बताए। बचत रकम महोत्सव स्थल स्तरोन्नती, औद्योगिक क्षेत्र विकास, कवि शिरोमणि लेखनाथ पौड्यालको जन्मस्थलको विकास, र वराह मन्दिर संरक्षणलगायतका परियोजनामा खर्च गरिनेछ।

प्रवेश शुल्क र सहभागीको अपेक्षा
महोत्सव अवलोकनका लागि साधारण प्रवेश शुल्क १०० रुपैयाँ तोकिएको छ भने विद्यार्थीका लागि ६० रुपैयाँ। साँझको सांगीतिक कार्यक्रममा भने ३०० रुपैयाँको टिकट दर तय गरिएको छ। आयोजकका अनुसार महोत्सव अवलोकन गर्न २ लाख ५० हजार दर्शक सहभागी हुने अपेक्षा गरिएको छ।

सांस्कृतिक सम्पदा र आर्थिक समृद्धिको साझेदारी
लेखनाथ महोत्सवले स्थानीय उत्पादन र संस्कृतिको संरक्षण गर्दै आर्थिक गतिविधिलाई प्रोत्साहन गर्ने विश्वास लिइएको छ। महोत्सव आयोजकले यसलाई स्थानीय चाडपर्वका रूपमा लिने गरेको र यो क्षेत्रको पहिचान झल्काउने महत्त्वपूर्ण कार्यक्रमका रूपमा विकास गरेको बताएका छन्।