मन्त्री यादव र एडिबी निर्देशक कोस्वाबीच एकीकृत खानेपानी आयोजना सम्बन्धी छलफल

काठमाडौँ, माघ ९ , २०८१

खानेपानीमन्त्री प्रदीप यादव र एसियाली विकास बैंक (एडिबी) का नेपालका लागि देशीय निर्देशक आर्नो कोस्वाबीच आज एकीकृत खानेपानी आयोजना कार्यान्वयन मोडालिटी तयारीका विषयमा छलफल भएको छ।

खानेपानी मन्त्रालयमा आयोजित बैठकमा मन्त्री यादवसहित मन्त्रालयको टोली र एडिबीका प्रतिनिधिहरूले एडिबीको ऋण सहयोगमा नेपालमा सञ्चालन हुने एकीकृत खानेपानी तथा सरसफाइ आयोजनाको मोडालिटीबारे गहन छलफल गरे।

दुई मोडेलको प्रस्ताव
मन्त्रालयका सहसचिव रमाकान्त दुवाडीका अनुसार बैठकमा सुधारिएको शहरी खानेपानी मोडेल र सुधारिएको क्षेत्रीय सहरी विकास परियोजना (आरयूडीपी) मोडेलमा अघि बढ्ने दुई विकल्पमाथि विचार-विमर्श गरियो। दुई वर्षअघि उठान गरिएका यी परियोजनाहरूलाई मन्त्री यादवको पहलमा छलफलमार्फत तीव्रता दिने प्रयास भएको हो।

मन्त्री  यादवको धारणा
छलफलमा मन्त्री यादवले एडिबीको सहयोगले नेपालमा शिक्षा, स्वास्थ्य, सडक, र खानेपानी जस्ता विभिन्न क्षेत्रमा ठूला परियोजनाहरू सञ्चालन भइरहेको र यसप्रति नेपाली नागरिक सन्तुष्ट रहेको बताए। उनले भने, “एडिबीको कामले नागरिक खुशी छन्। मन्त्रालयको लक्ष्य एडिबीका परियोजनाहरू चाँडै सम्पन्न गर्न सहयोग पुर्‍याउनु हो।”

मन्त्री यादवले आरयूडीपी मोडेललाई कार्यान्वयन गर्न तयार रहेको तर यसका लागि थप आवश्यक छलफल आवश्यक भएको धारणा राखे।

एडिबीको प्रतिबद्धता
एसियाली विकास बैंकका निर्देशक कोस्वाले एडिबीले विगतदेखि खानेपानीलगायतका ठूला परियोजनाहरू सञ्चालन गर्दै आएको र यी परियोजनाहरूबाट नागरिकलाई शुद्ध खानेपानी उपलब्ध गराउने प्रतिबद्धता व्यक्त गरे। उनले भने, “हामी नयाँ परियोजना सुरु गर्न तयार छौं र यसलाई छिटो कार्यान्वयनमा लैजान चाहन्छौं।”

प्रतिनिधिहरूको उपस्थिति
छलफलमा खानेपानी मन्त्रालयका सचिव प्रमिलादेवी शाक्य बज्राचार्य, खानेपानी तथा ढल व्यवस्थापन विभागका महानिर्देशक रामकुमार श्रेष्ठ, सहसचिव रमाकान्त दुवाडी, र एडिबीका अन्य प्रतिनिधिहरूको सहभागिता रहेको थियो।