वरिष्ठ अधिवक्ता माथि कुटपिटको घटनाप्रति बार एसोसिएशनको आपत्ति

काठमाडौं, २०८१ माघ ३
काठमाडौं जिल्ला अदालत बार एशोसिएशनले वरिष्ठ अधिवक्ता दिनेश त्रिपाठीमाथि भएको कुटपिट र दुव्र्यवहारप्रति गम्भीर ध्यानाकर्षण जनाएको छ। मिति २०८१ माघ २ गते काठमाडौं जिल्ला अदालत परिसरमा ठगी मुद्दाको थुनछेक बहसपछि अदालतबाट बाहिरिँदै गर्दा अधिवक्ता त्रिपाठीमाथि जाहेरवालाका प्रतिनिधिहरूको आक्रोशमा आधारित अमानवीय व्यवहार भएको थियो।

बार एशोसिएशनका अध्यक्ष आर.सी. बिमल र सचिव उकाल राम श्रेष्ठद्वारा जारी गरिएको प्रेस विज्ञप्तिमा कानुन व्यवसायीप्रति यस्तो आक्रमणले स्वतन्त्र न्यायपालिकाको सिद्धान्तमाथि चोट पुग्ने उल्लेख गरिएको छ। साथै, कानुन व्यवसायीले पेशागत धर्मअनुसार बहस पैरवी गर्ने अधिकारको सम्मान गर्दै घटनाका दोषीलाई कानुनी कारबाहीको दायरामा ल्याउन जोडदार माग गरिएको छ।

बार एशोसिएशनले कानुन व्यवसायीमाथिको कुनै पनि किसिमको आक्रमणलाई निन्दनीय मान्दै, यसले कानुनी शासन र लोकतान्त्रिक मूल्यमाथि धक्का पुर्‍याउने चेतावनी दिएको छ। विज्ञप्तिमा दोषीलाई तत्काल पक्राउ गरी आवश्यक कारबाही गर्न सम्बन्धित निकायलाई आग्रह गरिएको छ।

यो घटना कानुन व्यवसायीहरूको पेशागत स्वतन्त्रतामाथिको आक्रमण भन्दै कानुनी र सामाजिक सन्दर्भमा व्यापक बहस भईरहेकाे छ।