जेनजी आन्दोलनमा १९ जनाको मृत्यु, ३५० भन्दा बढी घाइते

काठमाडौँ, २०८२ भदौ २३
आज काठमाडौँमा भएको जेनजी आन्दोलन हिंसात्मक रूप लिँदा १९ जनाको गोली लागी मृत्यु भएको छ भने ३५० भन्दा बढी घाइते भएका छन्। संसद भवन परिसर प्रवेश गर्न खोज्ने आन्दोलनकारीलाई रोक्ने क्रममा सुरक्षाकर्मीले अश्रुग्यास र पानीको फोहरा प्रहार गरेका थिए। स्थिति नियन्त्रणबाहिर गएपछि गोली चलाइएकाले ठूलो जनहानि भएको हो।

घाइतेहरुको उपचार त्रिवि शिक्षण अस्पताल, वीर अस्पतालसँगै सिभिल अस्पताल र राष्ट्रिय ट्रमा सेन्टरमा समेत भइरहेको छ। चिकित्सकहरुले गम्भीर घाइतेमध्ये केहीको अवस्था चिन्ताजनक रहेको बताएका छन्। अस्पतालहरूमा भर्ना भएका बिरामी र आफन्तको चाप असामान्य रुपमा बढेको छ।

आन्दोलनकारीहरूले बेरोजगारी, भ्रष्टाचार, शिक्षा र स्वास्थ्यमा असमानता, तथा राजनीतिक नेतृत्वप्रतिको असन्तोष जाहेर गर्दै सडकमा उत्रिएका थिए। सामाजिक सञ्जालमार्फत सुरु भएको यो अभियान राजधानीमा व्यापक प्रदर्शनमा परिणत भएको हो।

सुरक्षाकर्मी र आन्दोलनकारीबीचको झडप चर्किएपछि सरकारले नयाँबानेश्वर आसपासका क्षेत्रमा कर्फ्यू आदेश जारी गरेको छ। साथै, राजधानीका अन्य संवेदनशील क्षेत्रमा सुरक्षा व्यवस्था कडाइ गरिएको छ।

राजनीतिक विश्लेषकहरूले यो घटनालाई युवापुस्ताको आक्रोश र असन्तोषको विस्फोटका रूपमा लिएका छन्। उनीहरूका अनुसार, राज्यले तत्काल संवाद र दीर्घकालीन समाधानको पहल नगरे आगामी दिनमा परिस्थिती अझ गम्भीर बन्न सक्ने देखिन्छ।