कलैयामा नयाँ खानेपानी पाइपलाइन विस्तार परियोजनाको शिलान्यास

बारा,

पुस १९ ,२०८१

बारा जिल्लाको कलैया उप–महानगरपालिका अन्तर्गत मानमत–कलैया–मटिअर्वा सडक खण्डमा जोडिने त्रिचन्द्र स्कूलदेखि भतौडा पोखरीसम्म (३.४ कि.मि.) नयाँ खानेपानी पाइपलाइन विस्तार परियोजनाको आज शिलान्यास गरिएको छ।

नेपाल खानेपानी संस्थान, शाखा कार्यालय कलैया, बाराको आयोजनामा गरिएको शिलान्यास कार्यक्रममा खानेपानी मन्त्री माननीय प्रदिप यादवको प्रमुख आतिथ्यता रहेको थियो।

मन्त्री यादवले खानेपानी जस्तो आधारभूत आवश्यकता पूरा गर्न सरकारले उच्च प्राथमिकता दिएको उल्लेख गर्दै यस परियोजनाले कलैया क्षेत्रका नागरिकहरूको दीर्घकालीन समस्या समाधान गर्ने विश्वास व्यक्त गर्नुभयो। उहाँले पाइपलाइन विस्तारले शुद्ध र सुरक्षित खानेपानी पहुँचमा सुधार ल्याउँदै नागरिकहरूको जीवनस्तर उकास्न मद्दत गर्ने बताउनुभयो।

नेपाल खानेपानी संस्थानका प्रतिनिधिहरूका अनुसार यो परियोजना समयमै सम्पन्न गरी स्थानीय नागरिकहरूलाई शीघ्र सेवा उपलब्ध गराइनेछ।

कार्यक्रममा स्थानीय जनप्रतिनिधि, समाजसेवी, र नागरिकहरूको उत्साहजनक सहभागिता रहेको थियो। सहभागीहरूले परियोजनाले क्षेत्रको विकास र जनस्वास्थ्यमा सकारात्मक प्रभाव पार्ने विश्वास व्यक्त गरे।