शिक्षा ऐन परिवर्तनको माग: पोखरामा अन्तर्क्रिया कार्यक्रम सम्पन्न

पोखरा, पुस ३
प्रजातन्त्रवादी प्राध्यापक संघ गण्डकी प्रदेश र नेपाल शिक्षक संघ कास्कीको संयुक्त आयोजनामा आयोजित अन्तर्क्रिया कार्यक्रममा शिक्षा ऐनमा आमूल परिवर्तन गर्नुपर्ने आवाज उठेको छ।
कार्यक्रममा शिक्षा प्रणालीमा देखिएका विकृति र समाधानका उपायहरूमा छलफल गरियो। सहभागीहरूले देशको आर्थिक विकास र समृद्धिको आधार नै शिक्षामा रहेको भन्दै शिक्षा क्षेत्रमा सुधारको खाँचो औंल्याए।

शिक्षाविद् तथा प्रा.डा. कुश्माकर न्यौपानेले विश्वविद्यालयमा कुलपति नियुक्तिमा देखिने विकृति अन्त्य गर्न जोड दिँदै प्राध्यापकहरूको अपमान बन्द गर्नुपर्ने बताएका छन्। उनले गणतन्त्रपछि विज्ञहरूको सम्मान गुमेको र कुलपति नियुक्तिका लागि राजनैतिक हस्तक्षेपको अन्त्य हुनुपर्ने धारणा राखे।

कार्यक्रममा प्राध्यापक भोलानाथ पौडेलले ५३ वर्ष पुरानो शिक्षा ऐनलाई अझै पनि प्रयोग गर्नुपर्ने बाध्यता रहेको भन्दै यसमा सुधार आवश्यक रहेको बताए।

कांग्रेस नेता नारायण प्रसाद साउदले शिक्षा ऐन संशोधन आवश्यक भएको र छिट्टै ऐन पारित गर्न पहल भइरहेको जानकारी दिए।