त्रुटिपूर्ण मतपत्र र षड्यन्त्रको आरोप सहित पृथ्वीनारायण क्याम्पसमा स्ववियु चुनाव स्थगित : चैत ६ गते निर्वाचन हुने।

पोखरा , ५ चैत ०८१

पृथ्वीनारायण क्याम्पस, पोखरामा आज (२०८१ चैत्र ५ गते) का लागि तोकिएको स्वतन्त्र विद्यार्थी युनियन (स्ववियु) निर्वाचन स्थगित भएको छ। प्रत्यक्ष तर्फको मतपत्रमा गम्भीर त्रुटि देखिएपछि निर्वाचन कार्य रोकिएको हो।
निर्वाचन समितिका अनुसार, प्रत्यक्ष तर्फको मतपत्रको दोस्रो कोलममा रहेको अखिल नेपाल राष्ट्रिय स्वतन्त्र विद्यार्थी युनियन (छैठौं) का अध्यक्ष पदका उम्मेदवारको नाम पछाडि रेजा लगाउने बक्स नै नराखिएको पाइएको थियो। यस गम्भीर त्रुटि देखिएपछि अखिल नेपाल राष्ट्रिय स्वतन्त्र विद्यार्थी युनियन (छैठौं) ले निर्वाचन कार्यालयको लापरबाहीप्रति कडा आपत्ति जनाएको छ। अखिल (छैठौं) ले जारी गरेको विज्ञप्तिमा अध्यक्ष पदका उम्मेदवारलाई भोट दिने कोठा नराखी मतपत्र छापिनु गम्भीर त्रुटि मात्र नभई निर्वाचन प्रक्रिया माथिको प्रश्नचिन्ह भएको उल्लेख गरिएको थियोे । विज्ञप्तिमा लापरबाहीको जिम्मेवारी लिनुपर्ने माग गर्दै सर्वदलीय बैठकको माग गरिएको थियोे । साेहि अनुसार  सम्बन्धित संघ, संगठन, संयुक्त प्यानल र स्वतन्त्र उम्मेदवारका प्रतिनिधिहरूसँग परामर्श गरी मतपत्र रद्द गरिएको थियो।
समय अभावका कारण नयाँ मतपत्र छपाई गरी ल्याउन नसकिएकाले आजको मतदान कार्य सुरु गर्न नसकिएको निर्वाचन अधिकृत प्रा.डा. रामचन्द्र पोखरेलले लिखित रुपमा जानकारी दिनुभयो। निर्वाचन समितिले पुनः मतदानको मिति २०८१ साल चैत्र ६ गते बुधबार बिहान ८ बजे तोकेको छ।
यता, अध्यक्ष पदका स्वतन्त्र उम्मेदवार कमल सुवेदीले क्याम्पस प्रशासनमाथि षड्यन्त्र गरेको आरोप लगाएका छन्। जागौं नेपाल मिडियासँग कुरा गर्दै सुवेदीले भने, "यो लापरवाही देख्दा प्राविधिक त्रुटि जस्तो लागे पनि वास्तविकता भने फरक छ। स्वतन्त्र उम्मेदवारले जित्ने लगभग निश्चित भइसकेपछि सुनियोजित रूपमा यस्तो षड्यन्त्र गरिएको हो।"
उनले क्याम्पस प्रशासनलाई यथाशीघ्र स्वच्छ, निष्पक्ष, शान्तिपूर्ण र भयरहित वातावरणमा निर्वाचन गराउन अपिल गरेका छन्।
नेतृत्व चयनका लागि उत्साहित विद्यार्थी मतदाताहरू निर्वाचन स्थगित भएपछि निराश देखिएका छन्। कतिपयले निर्वाचन समितिको कमजोरीमाथि प्रश्न उठाएका छन् भने अरूले निष्पक्ष र पारदर्शी प्रक्रियाको माग गरेका छन्।
निर्वाचन समितिले सम्पूर्ण विद्यार्थी मतदाता, संघ-संगठन, संयुक्त प्यानल तथा स्वतन्त्र उम्मेदवारहरूलाई पुनः मतदान प्रक्रियामा सहयोग गर्न आग्रह गरेको छ। समितिले निर्वाचन प्रक्रिया पारदर्शी र निष्पक्ष बनाउने प्रतिबद्धता जनाएको छ।
निर्वाचन स्थगित हुनुका कारण र पछाडि लुकेका सम्भावित षड्यन्त्रको विषयमा अझै पनि विभिन्न विद्यार्थी संगठन र स्वतन्त्र उम्मेदवारहरूबीच विवाद जारी रहेको छ। अब तोकिएको मितिमा निर्वाचन सफलतापूर्वक सम्पन्न हुनेमा विद्यार्थी समुदायले चासोका साथ प्रतिक्षा गरिरहेका छन्।