जैमिनीमा पाँचौं राष्ट्रपति रनिङ शिल्ड प्रतियोगिता सम्पन्न

सुजन आचार्य

२० पाैष ०८१ ।

जैमिनी नगरपालिका स्तरीय पाँचौं राष्ट्रपति रनिङ शिल्ड प्रतियोगिता २०८१ पौष १७ देखि १९ गतेसम्म भव्य रूपमा सम्पन्न भएको छ। प्रतियोगितामा राङखानी मा.वि., जैमिनी-१०, राङखानीले उत्कृष्ट प्रदर्शन गर्दै ७ स्वर्ण, ४ रजत, र २ कास्य पदक जितेर प्रथम स्थान हासिल गरेको छ। शान्ति मा.वि., जैमिनी-१, कुश्मिसेराले ६ स्वर्ण, ५ रजत, र ४ कास्य पदकसहित द्वितीय स्थान हात पारेको छ भने जनशिक्षित मा.वि., जैमिनी-६, अर्जेवाले ६ स्वर्ण, ४ रजत, र ४ कास्य पदक जितेर तृतीय स्थान प्राप्त गर्यो।

प्रतियोगितामा छात्र/छात्रा भलिबल, कबड्डी, तेक्वान्दो, ८०० मि. दौड, १०० मि. दौड, २०० मि. दौड, ४०० मि. दौड, १५०० मि. दौड, ४००४ मि. रिले दौड, १००४ मि. रिले दौड, शटपुट थ्रो, ज्याभलिन थ्रो, हाइजम्प, लङजम्प, र त्रिपलजम्पजस्ता खेलहरू समावेश गरिएका थिए।

यस अवसरमा गण्डकी प्रदेशस्तरीय हाजिरीजवाफ प्रतियोगितामा जैमिनी नगरपालिकाबाट समावेश भई प्रथम भएका शिक्षकहरू दिनेश शर्मा (जनता मा.वि., पैयू), दिपक शर्मा (विजुवा मा.वि., पैयू) र मिना सारु थापा (सुन्तलाचौर मा.वि., दमेक) लाई सम्मान प्रदान गरिएको थियो।

कार्यक्रम जैमिनी नगरपालिकाको आयोजनामा, नगर खेलकुद विकास समितिको संयोजनमा र सहारा युवा क्लबको सञ्चालन तथा व्यवस्थापनमा सम्पन्न भएको हो।