वरिष्ठ अधिवक्ता दिनेश त्रिपाठीमाथि हातपातको घटनाप्रति राष्ट्रिय स्वतन्त्र पार्टीको गम्भीर ध्यानाकर्षण

काठमाडौं, २ माघ २०८१

वरिष्ठ अधिवक्ता दिनेश त्रिपाठीमाथि काठमाडौं जिल्ला अदालत परिसरमा भएको हातपातको घटनाप्रति राष्ट्रिय स्वतन्त्र पार्टीले गम्भीर ध्यानाकर्षण जनाएको छ।

पार्टीले आज विज्ञप्ति जारी गर्दै अदालत परिसरजस्तो संवेदनशील स्थानमा भएको यस्तो घटना कानुनी शासन, न्यायप्रति विश्वास र सुदृढ राजनीतिक अभ्यासका लागि कदापि स्वीकार्य नरहेको जनाएको छ।

घटनामा पार्टीका कुनै सदस्यको संलग्नता पाइएमा पार्टी विधानअनुसार कारबाही गरिने स्पष्ट पार्दै पार्टीका प्रवक्ता (कार्यवाहक) मनिष झाले दोषी जोसुकै भए पनि कानुनअनुसार कारबाही गर्न सम्बन्धित निकायलाई आग्रह गरेका छन्।

विज्ञप्तिमा राष्ट्रिय स्वतन्त्र पार्टीको अनुशासन आयोगले पनि घटनाबारे ध्यान दिएको र दोषीमाथि यथोचित कारबाही गर्न कटिबद्ध रहेको उल्लेख गरिएको छ।

यस घटनाले न्यायप्रणाली र कानुनी प्रक्रियाप्रतिको नागरिक विश्वासमा नकारात्मक प्रभाव पार्न सक्ने भन्दै पार्टीले घटनाको छानबिनलाई निष्पक्ष बनाउन अपिल गरेको छ।